Hundrað sangir á YouTube
![](/uploads/tx_tcnewsmodule/skrivlig-roynd-flickr-by_jackhynes.jpg)
Vælumtókti spælilistin hjá Námi á YouTube við
føroyskum barnasangum er nú farin um tey hundrað. Mest spældi sangurin er hann,
sum er fyrstur á listanum. Tað er sangurin ”Mæ, mæ, mæ”, sum Sigrid Holm og
Brynhild Poulsen syngja í Spælimaskinuni, sum Livandi Orð góvu út sum
kasettuband í 1985. Helgi Jacobsen týddi sangin eftir svensku Charlottu
Höglund. Kathrina Skarðsá er ein av teimum, ið hevur gjørt tekningar til
Barnasangbókina. Júst hesin sangur byggir á hennara tekningar.
Árni Øregaard, sum hevur savnað sangirnar, sigur,
at 280.000 vísingar hava verið á rásini, og at 365 haldarar eru. At verða haldari
merkir, at fáa dagføringar, hvørja ferð ein nýggjur sangur verður lagdur út á
rásina, uttan at tú noyðist at leita.
Tað var í sambandi við at Barnasangbók Føroya varð
løgd fram á Bókadøgunum 24. november í fjør, at Nám fór at leggja somu
barnasangir út á YouTube. Árni, sum er margmiðlasmiður, hevur savnað gamlar
upptøkur og gjørt nýggjar upptøkur av sangunum, sum eru í sangbókini. Undir
hvørjum sangi er tekstur, so til ber at syngja við og læra seg orðini. Tænastan
er opin og krevur ikki hald.